In Wiehnachtsstimmung bringen deit di düsse CD gewiss, mit ehren erdigen Sound un de eenfachen, aver ehrlichen, mitünner ok originellen Texten. Wieldes „Een lütte Steern“ lies ahnen lettt, wat an Wiehnachten passeert is, gifft „Wiehnachten in de Welt“ en Rundblick över de Wiehnachtstraditschonen in Europa. Annerwegens geiht de Blick op de Gören, de vundaag annerrs sünd as fröher, oder dor ward mit en lütt Grienen de Wiehnachtshektik op’t Korn nahmen. To’n gröttsten Deel sünd dat Egenkompositschonen, dorto gifft dat mit „Sledenfohrt“ en neje plattdüütsche Version vun „Jingle Bells“. Instrumentell fangt dat an bi Keyboard, geiht över Percussion un Gitarre bet hen na Waldzither un Fleiten. Mehrstendeels steiht aver liekers de Gesang in’n Vörgrund, sodatt de Texten goot to verstahn sünd. De Titels: 1. Stille Wiehnachtstiet 2. Winterspazeergang 3. Lichterfloot 4. Töben op den Winter 5. Kumm danz mit mi 6. Advent 7. Winterwind 8. Wiehnachtsgeschenke-Söker-Blues 9. Wiehnacht överall 10. Wiehnachten in de Welt 11. Wiehnachtsmann 12. Een lütte Stern 13. Winterabend 14. Op spitze Töhn 15. Slaapleed to Wiehnachten 16. Sledenfohrt 17. Een lütte Stern „Liekedeler“ sünd en Grupp, de sik 1989 tosamendoon hett. Wat ut Freid an’t Musikmaken un an de plattdüütsche Spraak anfüng, wör flink en Nebenberoop för de söss Lüüd. Liekers hebbt se all noch’n „anstännigen“ Beroop. „Liekedelers“ weer de Naam vun Klaus Störtebeker sien Seerövers, de Lust, Leed un Gewinnst to glieke Dele delen deen – jüst so as de Liekedelers vun vundaag: Bert C. Biehl, Gert Drögemöller, Christoph Göritz, Jörn P. Schröder, Carola Schacht un Johanna un Klaus Kastendieck. De Liekedeler sünd al faken in’t Fernsehn optreden, se maakt jedet Johr en nejet Programm för’t Johr un een för Wiehnachten. Se singt över Land un Lüüd, wüllt aver nich för Gewalt op „volkstümlich“ maken. De plattdüütsche Musik hören will, de sik nich so kommerziell un aalglatt anhört, de liggt bi Liekedeler richtig! Mit Booklet, wo all de Texten instaht. Uetersen: Dwarslöper Musikproduktion 1997.
